አንቺና እርስዎ

አንቺና እርስዎ

አንቺ ባለማለቴ ምነው መቀየምዎ
በሆዴ ባይገቡ ባልገባ በሆድዎ
ባይሆን የሚያምርብዎ በጣም እንድቀርብዎ
እሷን ይተውልኝ ፥ አለኝ ጉዳይ ከዛች ልጅዎ

ሰኔ ሁለት ሁለት አንድ ላይ ሲጻፍ ኡራኤል ለት [2018]
ብሩክ በ.

ስደት

ስደት
ካገሩ የወጣ ካገሩ እስኪመለስ
ቢጭኑበት በቅሎ ቢጋልቡት ፈረስ
ካዝማሪ አፍ አምሮ ሲለፈፍ
አምሮ ተጽፎ ጥቅሱ ሲለጠፍ
ሲዖል ሣቀች ባዝማሪ
ዐይታ ሲስት ቀባጣሪ
ሰው ቀዬውን ዘግቶ
ከቤት ካገር ሲርቅ
አልሆን ቢል ተከፍቶ
ከሰው ቤት ሲወድቅ
በሰው አገር ራሱን ሲሸጥ
ብኩርናውን ባዶ ሲለውጥ
ቤቱን በልቶት ዳዋ
ዐረፍ ቢል ከሰው ታዛ
ዕድሜ ጉልበቱን ሲሰዋ
ወርቅ ሸጦ አፈር ቢገዛ
ባይኖረው ነው ተስፋ
ባይኖረው ነው ነገ
ነገ ከነገ ወዲያ
አሻግሮ ያየ አንገቱ የሰገገ
ባይኖረው ነው ተስፋ
ባይኖረው ነው ነገ
ነገ ከነገ ወዲያ
እና ቢጭኑት ባይጭኑት
ቢሰቅሉ ቢያወርዱት
አገሩ ከቀረች ተሸርፋ በልቡ
አገሩ ከሞተች ተኝታ በልቡ
ምንስ ቢያደርጉት የለም ከቀልቡ
እግሩን ያነሳ ቀን ሞቷል በሐሳቡ
ስደት የገባ ቀን አርጓል በምናቡ
ካምላክ ነው ፍርዱ
ካምላክ ነው ጠቡ
ቤት ቤተሰብ ዘመድ ወዳጅ በትኖ
በቃ ጠፍቷል ሄዶ እንደ ውሃ ተኖ
ኋላውን ላያይ እንደ ሎጥ ሚስት
ተስፋን እምነትን ገድሎ ቀብሯል ከፊት
ሲዖልን መኖር ነው ስደት
ሲዖልን መልመድ ነው ስደት
የምን ስርየት የምን ምጻት
ስደት ማለት ነው ወጥቶ መቅረት
እያዩ ማንቀላፋት ሳይኖሩ መሞት

ሚካኤል የሰኔው 2018
ዶ/ር ዐቢይ ለመለሳቸውና ገና ለሚመልሳቸው

ጭንቅላት

ጭንቅላት

ዐውቃለሁ ግድየለም ፥ ጥንትም መታወቁ

በድፍን አገር ዞሮ ፥ ባደባባይ ጣይ መሞቁ

ያኔም እንደሚታወቅ ፥ ከወገብ በላይ ጥጋብ

ያመጣል አይቀርም ፥ ከወገብ በታች እራብ

እና ያቺ ልጅ እንዲያ ጭንቅ ያላት

ባይኖራት ነው ማሰቢያ ጭንቅላት

ቁንጣን ከያዛት በቅበላ

ተዋት ትጥገብ ኣላንድ ቀን አትበላ

ባንጎል ትታ ብታስብ በ*ላት

ግድነው ጭንቅ ቢላት

ግድነው ጭንቅላት

ሬብ ቆሽት ምን አቅም አላት

ብሩክ በ. በዕለተ ስላሴ የሰኔው 2018 [በራሴ አቆጣጠር]

ለምን?

ለምን ?
ለምን የሚል ጅል ጥያቄ አለኝ 
እንደ ልጅነቴ
ለምን ግን ለምን እቴቴ
ለምን ግን አጎቴ
ለምን ሁለት አፍንጫ ቀደዳ 
ባንድ ሰርን አንዴ ለማሽተት
ለምን ሁለት ጆሮ ግራና ቀኝ 
ባንድ ጆሮ ግንድ ለመስማት
ለምን ሁለት ዓይን ግራና ቀኝ የማይተያዩ
ሌላውን አማርጠው የሚያዩ
ለምን ሁለት እጅ አንዱ ምንም ላይበጅ
ለምን ሁለት ኩላሊት አንዱ ምንም ላይበጅ
ለምን ሁለት እግር
ለምን ሁለት አንጀት ታላቅና ታናሽ
ለምን ሁለት ሳንባ አየር አመላላሽ
ለምን ሁለት ልብ ደም ቀጂ ፥ ደም መላሽ
ለምን ሁለት መንታ አንጎል ግራና ቀኝ የተጣብቁ
የማይላቀቁ፣ ምንነታቸው ያልታወቁ
ሁለንተናችን ፥ ነገር ዓለማችን ሁለት ሆኖ
መጨረሻው ባንድ የማይታይ ተበይኖ
አብ ወልድ መንፈስ ቅዱስ ካልገባን እንላለን
እነሱ እኛን ፈጥረውን

ብሩክ በ. ሰኔ 6፥ 2018 [በራሴ አቆጣጠር] 
ክፍል ፩ ነው
ያውጣኝ ከክፍል ፪
ያውጣኝ በይ እቴቴ
ያውጣኝ በል አጎቴ

እግዚአብሔርም ብሔር አለው ብለሽ

እግዚአብሔርም ብሔር አለው ብለሽ
በብሔር ራስሽን የገለፅሽ
እግዜር ሁሉም ጋ ከፍ ብሎ
ወደ ላይ ወጣልሽ
ከአድማስ በላይ
ርቆ ከሰማይ ሔደልሽ
አንቺ ግን አሁንም እዚያው ነሽ
የማይዘረጋ ሰንደቅሽን
ሟች ባንዲራሽን
ከታች ገና ትቋጥሪያለሽ
ብሩክ በ. ሰኔ 5/2018

ነገረ ሰብ

ነገረ ሰብ

በጣም ብዙዎች

አንዲት ኢንች ስትሰጣቸው

አንድ ማይል አይቀር መውሰዳቸው

እና ሌሎች ብዙዎች

አንድ ማይ ሲሰጣቸው

የታለ ኢንቹ አይቀር ማለታቸው

ዝም ብለህ ብቻ ገሥግሥ

ከነፈሰው አትንፈስ

ምንም ቢደረግ እንደማይረካ

ታይቷልና ያኔ ዕፀበለሱን ሲነካ

ያዳምን ዘር አርካለሁ ብለህ አትኳትን

ሔዋንን ዘር አርካለሁ ብለህ አትቦዝን

ሥራህን ብቻ ሥራ የፊት የፊትህን

ሕሊናህን ታዘዝ አስደስት ቀልብህን

ብሩክ በየነ ሰኔ 1/ 2018 [በራሴ አቆጣጠር]

 

 

የባይተዋር ቀብር ብሎ ነገር

የባይተዋር ቀብር ብሎ ነገር

የሰዎችን አጭር የሕይወት ታሪክ

ቀብራቸው ላይ ሰምቼ ፥ ሰምቼ

ሁሉንም አንድ ሆኖ አግኝቼ

ገነት እንደሞላ ገብቶኝ

ተስፋ ቆርጪያለሁ ወገኖቼ።

ይላል ምስኪን ታዛቢ ተመራማሪ

ምናልባት ከባይተዋር ቀብር ተቀባሪ

ብሩክ በ. ሰኔ 1/2018 [በራሴ አቆጣጠር]

ምስል አርዕስት ፦ ከንቱ ያለፉ ግመሎች