ለባለወይራ ቅጠሉ ጥምጣማም

ያኔ በሞኝ ዘመን በየዋሆቹ
እረኛው ሲሞት ለበግ ግልገሎቹ
ሕሊና ካገር ሳትሰደድ እውነትም ሳታብድ
አንድ ለብዙ ብዙ ለአንድ ለመኖር ሲገደድ
ለጋራ ጥቅም ለአንድነት ሀብቱ
ሰው ሲሞት ለማተብ ለእምነቱ
የምንትስዬ ቦታ፣ ሚና ግራ ቢገባህ
ዋሾውን አስመሳይ መቅጣት ቢዳዳህ
ያኔ በዛ ዘመን ቅዱስ፣ በተባረከው
"እውነት ማነው ማንትስ?" ነበር ያልከው
ያኔ በዛ ዘመን ሳይረክስ በፊት ሰው
*****

አሁን ግን በዚህ ቆቅ ዘመን በቁራዎቹ
ቄራ በተስፋፋበት ሲሳይ ለአሞሮቹ
አንዲት ብልት ብቻ ናት በጣም ኢምንት
የማይሸጥ የለም አሁን ጸጉርም ዋጋ አላት
*****

እና ባለወይራው ቅጠል ዘውድ፣ የዋሁ ዳኛ
እንኳንም አላየህ በል በሰላም ባለህበት ተኛ
ብትጠይቅ ባትጠይቅ ላንተ ማን ቦታ ሰጥቶ
ራሱን እየቸበቸበ ነው ሰው በዝቶ አብዝቶ

እና በዚህ ደግ ዘመን ሰው አካሉን የሚሸጥበት በችርቻሮ
ማነው ምንትስ ብትል ማን ሊሰማ ማን ሊሰጥህ ጆሮ
ሁሉም ተነካክቷል ራስን ሸጦ ማደርን ተክኖበታል
ዘመነ ምንትስ መሆኑን ምንትስ ሁሉ ገብቶታል
ራሳችንን አንድ ባንድ ቆጥረን ስናከራይ
በልቶ ለማደር ለአዱኛ ክብር ለሆድ ሲሳይ
ባለወይራው ቅጠል ጥምጣም ምንኛ እግዜሩ ወዶሃል
ይኼን ሁሉ ሸቀጥ ሳታይ በጊዜ ከቤቱ ወስዶሃል
ላንዲት ምንትስ ሲገርምህ አገሩ ሁሉ ምንትስ ሆኖልሃል

ሰኔ 3፣ 2017

ለሎሬት ፀጋዬ ገብረመድህን

በዓመቱ ላይ የተጨመረው ስምንት ዓመት
ሌላ ምሥጢር የለውም ቀድሞ ነው ለማርጀት

ብ. በየነ